Shërbimet e ofruara për kujdesin e fëmijëve në Qendrën CONCORDIA Tranzit

Qendra Tranzit ofron shërbime të integruara sociale dhe komunitare për ta parandaluar braktisjen e shkollës nga fëmijët në kuadër të Komunës së Prizrenit. Shërbimet e ofruara për arritjen e këtij targeti përfshijnë (1) asistencën sociale, (2) mbështetjen psikologjike duke përfshirë këshillimin për fëmijët me fokus në vajzat e reja; (3) mbështetjen në shkollim (mësim plotësues dhe detyra të shtëpisë si dhe mbështetje materiale); gjithashtu edhe (4) mbështetjen mjekësore. Në kuadër të mbështetjes mjekësore, CONCORDIA mundëson vlerësime të rregullta shëndetësore dhe mbështetje për fëmijët që t'ju qasen shërbimeve shëndetësore publike. Organizata gjithashtu punon në ofrimin e një mjedisi të shëndetshëm jetësor për fëmijët.

Në qendrën CONCORDIA Tranzit, rëndësi e veçantë i'u kushtohet edhe aktiviteteve të ndryshme edukative dhe rekreative për fëmijë duke përfshirë punëtori arti, klasa të muzikës, aktiviteteve dhe garave sportive, punëtorive për zhvillimin e aftësive për jetë dhe ngritjes së përfshirjes qytetare të fëmijëve përmes vizitave në institucione të ndryshme shtetërore. 

Pranimi i përdoruesve të programit në Qendrën Tranzit 

Paraprakisht pranimit të fëmiut si përdorues programi në Qendrën Tranzit, punonjësit social dhe psikologu i Qendrës CONCORDIA Tranzit kryejnë vlerësimin fillestar të gjendjes së tij/saj. Më pas, zhvillohet një program i personalizuar i ndërhyrjeve i bazuar në vlerësimin fillestar dhe qëllimet që pritet të arrihen. Më detajisht, përcaktohen objektivat e ndërhyrjes, mënyrat se si duhet të përmbushen ato, kohëzgjatja e ndërhyrjes dhe personat përgjegjës të përfshirë në procesin e punës. Në këtë mënyrë, identifikohen nevojat dhe prioritetet e fëmijës. Ky planifikim ndihmon gjithashtu në drejtimin e ndërhyrjeve për arritjen e objektivave të fëmijës. Ndërkohë, CONCORDIA merr përsipër t'i informojë dhe t'ju shpjegojë fëmijës dhe familjes së tij/saj rreth roleve dhe përgjegjësive të tyre në ndërhyrje si dhe mënyrën se si do të kryhet ndërhyrja.

Në përcaktimin e orarit ditor të fëmijëve në Qendrën Ditore CONCORDIA Tranzit, merret parasysh mosha e fëmijës, niveli i zhvillimit, potenciali, nevojat dhe aftësitë e tij/saj.  Orari ditor i fëmijëve gjithashtu përshtatet sipas sezonit, programit shkollor dhe periudhave të pushimeve.